المدرسۃ الاسلامیہ العالمیہ کی طرف سے ہم آپ کو خوش آمدید کہتے ہیں۔ اس ادارہ کا آغاز 2020ء میں کیا گیا تھا جس کا بنیادی مقصد رسول اللہ ﷺ کے لائے گئے دین "اسلام" کی ترویج اور اس کو لوگوں کی عملی زندگی میں شامل کرنے کے لیے کوششیں کرنا ہے۔ کلمہ حق کی ادائیگی کے ساتھ ہی انسان کی شناخت بدل جاتی ہے اور اس کو "مسلمان " کی شناخت حاصل ہو جاتی ہےاور اس شناخت کے ساتھ ہی "مسلمان" پر اطاعت الٰہی کا فریضہ عائد ہو جاتا ہے۔ اللہ رب العزت نے "انسان" کی رہنمائی کے لیے قرآن مجید کی صورت میں ایک مکمل مجموعہ عنایت فرمایا ہے جس میں انسان کی تخلیق کو مدنظر رکھتے ہوئے انسانی زندگی کے ہر پہلو اور ہر حیثیت کے لیے احکامات بیان کیے گئے ہیں۔ محمد مصطفیٰ ﷺ کے اعلان نبوت سےتعلیم قرآن کے ذریعے انسانوں کو یہ رہنمائی پہنچانے کا سلسلہ شروع ہوا جو آج تک جاری و ساری ہے۔ المدرسۃ الاسلامیہ العالمیہ اس سلسلہ کو آگے بڑھانے کے لیے ایک عملی قدم ہے جس میں شریعت محمدیہ ﷺ کی تعلیمات کو طلباء و طالبات تک پہنچانا مقصود ہے تاکہ آج کا نوجوان عصر حاضر کے چیلنجز سے نبرد آزما ہو سکے۔ اس مقصد کے حصول کے لیے ادارہ "المدرسۃ الاسلامیہ العالمیہ " نے اپنی اصل اسی شجر سے پیوست کی ہے جس کو ہمارے ہاں روایتی یا بنیادی مکتبہ فکر کہا جاتا ہے۔ اسی لیے روایتی مکتبہ فکر کے نمائندہ بورڈ "وفاق المدارس الاسلامیہ الرضویہ (رجسٹرڈ) " جو کہ HEC اور وفاقی وزارت تعلیم سے منظور شدہ ہے کہ ساتھ "المدرسۃ الاسلامیہ العالمیہ" کا الحاق کیا گیا ہے۔ ہمارے تعلیمی مقاصد کے حصول کے لیے جن کورسز کو ہدف بنایا گیا ہے ان میں حفظ القرآن، تجوید و قرات، درس نظامی اور عصری ضروریات کے تحت ترتیب دئیے گئے مختصر دورانیہ کے کورسز شامل ہیں۔